Jagart news (नरेश डुडी प्रधान संपादक) विश्व तणै मायड़भासा दिवस रै खास उच्छब दिन आप सगळां नै जै राजस्थानी,
जै राजस्थान,
जै मायड़भासा......
आ घणी हरख री बात है विश्व तणै मायड़भासा दिवस रौ आयोजण करणों आखै दुनिया री सगळी सांगोपांग भासावा नै माण-सम्माण देवणो है,आपणे राजस्थान खेतर री सबळी अर सांवठी भासा राजस्थानी है अर आ ही आपणी मायड़भासा है| ई आपणी मायड़भासा राजस्थानी मायं घणौं मिठास अर अपणायत भरिजेड़ो है,साहित री दीढ सूं राजस्थानी घणी समरथ भासा है,राजस्थानी भासा रौ साहित घणैं ओपते ग्यान री औळखाळं कराव है|राजस्थानी भासा न्यारी-न्यारी बोलियां नै आपरे साथे लेर चालण री पूरी खिमता राखे है....
सिरकारी तिन्तर अर नेतावां री उदासिणता रै कारणे अबार ताई आपणी मायड़भासा राजस्थानी नै संविधान री आठवी अनुसूची रै पानड़े मायं नी जोडण सूं राजस्थानी भासा जकी अणुतै साहित भण्डार सूं सिछम भासा है बा दूजी भासावा सामी पांगळी बणे फिरै है.....
ओ हरेक राजस्थानी रौ फरज बणै है के मायड़भासा रो करज उतारबा ताई आपरे कानी सूं सुवाया पिरयास राजस्थानी भासा रै उत्थान अर बिकास सारू करै.....
मायड़ बिना घर सुनो
मायड़भासा बिना आ मिनखादेह सुनी.....
जै राजस्थान...
जै राजस्थानी
एक टिप्पणी भेजें